Nafarroako Udal eta Kontzejuen Federazioa

Nafarroako Gobernuak toki-erakundeei zuzenduriko laguntza deialdi berria aurkeztu du despopulazioari aurre egiteko inbertsioetarako. 2026rako eta 2027rako izango dira. Ia hiru milioiko aurrekontua dute eta Nafarroako 143 udalerriri eta 166 kontzejuri onura ekar diezaiekete.

Baldintzen eta eskaerak egiteko prozeduraren inguruko informazio gehiago jasotzeko tramitearen web-fitxa kontsulta daiteke: fitxa ikusteko esteka. Pirinioetako Planaren lurralde-eremuan dauden udalerriak eta kontzejuak ez dira deialdi horretan sartzen, dagoeneko plan estrategiko bat baitute, adostutako ibilbide-orriarekin eta finantzaketarekin.

Diru-laguntza lor dezaketen jarduerak

Diru-laguntzen deialdiaren helburua da jarduerak sustatzea, udalerrien eta kontzejuen zuzkidurak erronka demografikoaren errealitatera egokituz, Nafarroako Despopulazioaren aurka Borrokatzeko Estrategiaren ardatzak lortzeko bidean aurrera egin ahal izatearren.

Deialdiaren arabera, inbertsio hauek izango dira finantzagarriak: alokairuko etxebizitzak, ohiko bizileku iraunkorrerako espazioak eta eraikinak erosteko edo birgaitzeko (opor-alokairua ez da sartzen); erabilera anitzeko aretoak sustatzea, lokalak erosteko edo birgaitzeko jantoki sozialetarako, ludoteketarako, zaintzako profesional ibiltarientzako edo jarduera fisiko egokitua bezalako erabileretako.

Gainera, diru-laguntza izango dute mugikortasun irisgarrirako pentsatutako ekintzek; hala nola, mugikortasun egokituko ibilgailuak edo irtenbideak erosteko edo egokitzeko, hezkuntza, osasuna edo zaintzak bezalako oinarrizko zerbitzuak eskuratze aldera. Halaber, diruz lagunduko dira irisgarritasuna hobetzeko ekintzak; esate baterako, oztopo arkitektonikoak ezabatzeko berrikuntzak (arrapalak, igogailuak, seinale egokituak edo lokal publikoetako ibilbide irisgarriak).

Era berean, coworkingerako espazioak finantzatu ahal izango dira, lanerako lokalak erosita edo birgaituta. Orobat, landa-inguruneetan adinekoen kalitatea hobetzeko, teknologiak eta adimen artifiziala erostea diruz lagunduko da.

Balorazio-irizpideak

Laguntza-deialdian agertzen diren balorazio-irizpideen artean, ondorengoak aurkitzen dira: inbertsioa egingo den udalerriaren despopulazio-arriskuaren indizea; azpiegitura hainbat udalerritarako planifikatzea; udalerrian antzeko azpiegiturarik ez izatea; despopulazioaren aurka borrokatzeko proiektu berritzailea izatea; edo ingurumen-iraunkortasunari laguntzea.

Despopulazio-arriskuan dauden udalerri eta kontzeju guztiei zuzendutako deialdi honek Pirinioetako Planaren bidez toki-erakundeei transferitutako funtsak osatzen ditu; era horretan, foru-komunitateko lurralde osora iristen da, despopulazioaren aurka borrokatzeko ekimenak hedatzeko.

Irudian, NUKFk despopulazioari aurre egiteko antolatu dituen parte-hartze topaketetako bat.