Nafarroako Udal eta Kontzejuen Federazioa

Nafarroako Udal eta Kontzejuen Federazioko (NUKF) lehendariak, Xabier Alcuazek, toki eremuan herritarren arreta presentziala eta hurbilekoa indartu behar dela defendatu du, funtsezko tresna baita administrazioa herritarrengana hurbiltzeko, lurralde ekitatea bermatzeko eta herrietako bizimoduari eusteko.

Nafarroako Gobernuak herritarrei arreta emateko modu berriei buruz antolatutako jardunaldian, Alcuazek nabarmendu du udalak, kontzejuak eta mankomunitateak direla “administrazio hurbilena, berehalakoena eta gizatiarrena”, eta azpimarratu du udal ordezkariek eta teknikariek funtsezko eginkizuna betetzen dutela herritarrei egunero laguntzeko, batez ere udalerri txikienetan.

NUKFko presidenteak adierazi du digitalizazioa beharrezkoa dela eta ongi etorria dela, baina ohartarazi du oraindik ere arrakala digital handia dagoela landa eremu askotan, non aurrez aurreko arreta ezinbestekoa den. “Adinekoek, baliabide gutxiago dituztenek, konektagarritasunik ez dutenek edo behar adinako prestakuntza digitalik ez dutenek hor egon gaitezen behar dute. Haientzat, toki entitateak gara, kasu askotan, haien euskarri bakarra “, adierazi du.

Zentzu horretan, Alcuazek 012 telefono zerbitzua bezalako ekimenei balioa eman die, dagoeneko hainbat toki entitatek bat egin baitute horrekin, eta “eredugarritzat” jo du Nafarroako Gobernuak bultzatutako herritarren arretarako bulego mugikor berria martxan jartzea.

Halaber, gogorarazi du NUKFk despopulazioa geldiarazteko proposamen zehatz bat helarazi diela berriki Gobernuari eta Nafarroako Parlamentuari: administrazio zentroen sare planifikatu bat sortzea, zerbitzuak zabaltzeko eta alferrikako joan-etorriak saihesteko. “Tramite sinple baterako dozenaka kilometro egitea ez da bakarrik deserosotasuna: berdintasunerako oztopo bat da”, azpimarratu du erakundeko lehendakariak. “Nafarroa egituratua, kohesionatua eta etorkizunekoa nahi badugu, administrazioa pertsonengana hurbildu behar dugu, eta ez alderantziz”, gaineratu du.

Alcuazek NUKFren konpromisoa berretsi du administrazioa modernizatzeko prozesuetan laguntzeko, “baina hurbiltasunaren printzipioa inoiz galdu gabe”. “Iruñeko auzo batean funtzionatzen duenak agian ez du balio Pirinioetako herri batean. Eta batzuek bigarren mailakotzat jotzen dutena, herri batean funtsezkoa izan daiteke “, adierazi du.

Azkenik, toki entitateetatik herritarrak artatzen dituzten pertsona guztien eguneroko lana eskertu du, gizarteak arlo publikoan duen konfiantzari eusteko funtsezko eginkizuna aldarrikatuz: “Haien lana, askotan ikusezina, funtsezkoa da herritarrek arlo publikoan konfiantza izan dezaten”, aldarrikatu du.

Irudian, Xabier Alcuaz, NUKFko lehendakaria