Nafarroako Udal eta Kontzejuen Federazioa

Nafarroako GGKEen Koordinakundeak toki entitateei dei egin die El Salvadorren nazioarteko lankidetzarekin duten konpromisoa mantendu eta indartzeko, herrialdeak giza eskubideen arloan bizi duen atzerakada larriaren eta gizarte erakundeen ekintzarako gero eta zailtasun handiagoen aurrean. Nafarroako Udal eta Kontzejuen Federazioak (NUKF), eskaera horren ildotik, egoerari buruzko informazio eguneratua igorri die udalei, eta prest agertu da proiektuak lagundu eta babesteko.

2022ko martxotik, Nayib Bukele presidenteak agindutako salbuespen-erregimenak salaketa ugari eragin ditu oinarrizko eskubideen urraketengatik, atxiloketa arbitrarioak eta adierazpen-askatasunaren murrizketak barne. Horrez gain, Atzerriko Agenteen Legea onartu berri da, kanpoko funtsak jasotzen dituzten erakundeei karga eta muga berriak ezartzen dizkiena.

Lege honen neurri kezkagarrienen artean daude nazioarteko dohaintza eta transferentzien gaineko % 30eko zerga ezartzea, aurretiazko baimenik gabe jarduera politikoetan parte hartzeko debekua, erregistro espezifiko batean inskribatzeko betebeharra eta ez-betetzeen kasuan zigor penal eta administratiboak aplikatzea. Xedapen horiek El Salvadorko erakunde askoren bideragarritasuna mehatxatzen dute, Nafarroako udalek eta beste erakunde batzuek finantzatutako proiektuen tokiko bazkideak.

Jokaleku berri horren aurrean, Nafarroako GGKEen Koordinakundeak toki entitateei eskatu die El Salvadorreko lankidetza babesteko, egikaritzen ari diren edo formulazio fasean dauden proiektuei ahalik eta malgutasun handiena emanez, eta justifikaziorako baldintza administratiboak Salvadorko araudi berrira egokitzea baloratuz.

Federazioak giza eskubideetan oinarritutako lankidetzarekiko konpromisoa berretsi du, eta udalen esku jarri da, deialdiak eta prozedurak testuinguru aldakor horretara egokitzeko aholkuak emateko.